بسم الله الرحمن الرحيم
صور رحلة القاهرة نوفمبر 2008
-----------------
فور الشعور ببعض الملل قررنا اننا نقضي ع الملل دا و نروح رحلة للقاهرة
و على طول على الاستاذ مصطفى سليمان و اقوله عايزين نطلع رحلة
طبعاً من واقع سلطتي ماقدرش يرفض و فوراً خلال فترة قليلة كان منظم رحلة للقاهرة من خلال المدرسة اللي هو مدرس فيها
المهم .. الشلة في الرحلة دي كانت بتتكون من 4 افراد
السيد شاكر - محمد العيسوي - محمود عطية - درش (الاستاذ مصطفى)ـ
نروح للصور و تعليقاتي الخاصة عليها
-----------------
نبدأ بقائد الفوج السياحي العظيم .. مستر مصطفى سليمان و معاه رجل الاعمال الشهير السيد شاكر
طبعاً هو اللي كان بيميل عليا يعني هو اللي عايز يتصور معايا طبعاً
و بينما الاستاذ مصطفى كان عمال يتصور معايا الف صورة علشان يوريها للناس و يعرفهم انه تصور معايا
كان العيسوي و محمود بيمزكوا في مكانهم في اخر الاوتوبيس
نزلنا الهرم يا رجالة .. لاحظوا اني قولت يا رجالة .. يعني اي نسوان ما يركزوش معانا في الكلام دا
من اليمين
العيسوي - درش - البرنس - محمود
و في وسط ماحنا غرقانين في التصوير ॥ يطلع لنا عسكري يقولنا انزلوا ممنوع الطلوع
اقوله يا باشا ما الناس كلها طالعه .. يقولي لا انزلوا .. مع اننا ما كناش في مكان عالي يعني
المهم .. شغلت مخي بسرعه .. و قولت نثبت الراجل دا .. تعالى يابو الباشا تصور معايا
لأ و ايه .. حاططلي ايده في جيبه .. بيفكرني برياض باشا البنطلوني
و طبعاً كانت النتيجة انه سابنا براحتنا
محمود قاعد ع السور المحيط بمنطقة الهرم .. لو حد نزل من ورا السور دا اكيد اكيد اكيد مش هيطلع تاني
العيسوي في اخر مكان في منطقة الهرم .. و اللي زي ما قولنا اللي هيقع تحت و حياة امي ما هيطلع
تعالوا نركب الجمل .. و نركب ابوه كمان .. احنا هنخاف ولا ايه
في الحقيقة دا الكلام اللي ما انقالش لاننا كلنا بلا استثناء عمرنا ما ركبنا جمل قبل كدا و اسمع انه خطير في الطلوع و النزول
بس طبعاً المغامرون التسعة قرروا انهم يقضوا على الخوف و على حياتهم بالمرة و يركبوا الجمل
المعلم حاطط ايده في وسطه ولا اي حاجه و عاملي فيها ابو لهب زمانه
طب ما كان يورينا الشجاعة بتاعته و يركب الاول .. لا .. استنى اخر واحد
!!! صورة اخيرة بقى قبل ما نروح الهرم التاني .. ولا انت رأيك ايه يا مرسي
نسيبنا من الهرمين دول بقى و نروح لسفنكس باشا شوية
يالا نروووووح عند ابو الهول .. بس على فكرة .. مدخل ابو الهول مختلف تماماً .. يحسسك انك في معبد
و انت يا عيسوي .. رأيك ايه في الموضوع دا ؟
مين ؟ انا .. اه اه .. زي ما قال درش -اكيد هو دا ابو الهول بشحمه و صخره
خلصنا من موال الهرم كله - و اكيد بعد الصحراء و الحر دا كله عايزين حاجه لطيفه
تعالوا نروح ع النيــــــــــــــــــل
طب ايه رأيكم نركب مركب ؟؟ .. اكيد فكرة بــيــس
مشاعر الصداقة تتحرك في وقت الصفاء
و زي ما شوفنا ان مشاعر الصداقة تحركت من شوية
تحركت مشاعر صداقة من نوع تاني
خلاص .. اعصابنا راقت .. تعالوا بقى نتمشى شوية .. و ندردش
طب فين ؟ .. اكيد في الحديقة الدولية
اول حاجه نركب الطفطف .. بس طبعاً
الشلة ليها طريقة ركوب مختلفة عن كل الناس
بعد كدا نروح الاماكن الهادية و اللي مليانه خضرة
الرحلة ما انتهتش - لكن البطارية انتهت
و بكدا خلصت صور الرحلة
سي يو