بسم الله الرحمن الرحيم
كنت ماشي في يوم بعد صلاة العشاء في وسط البلد
طبعاً في كفر صقر مش القاهرة
المهم .. لفت نظري
راجل عجوز رفيع و قصير و شكله عيان جداً
لأ وكمان اعمى .. كان ماشي في وسط الطريق و بيسند على عصايته
و مامعوش اي حد خالص ॥ تخيلوا عجوز و عيان و اعمى و في وسط الطريق و لوحده
بصراحة قلبي اتنفض
اول ما شفته و جريت بسرعه علشان امسك ايده و اوصله
اول ما مسكت دراعه حسيت بشئ روحاني جميل جداً
فقولت للراجل : رايح فين يا حاج ؟
قالي : مروح
قولتلو : ايوه مروح فين يعني ؟
قالي : هخش من الشارع ده و بعدين ده و ده و كان بيشاور تمام زي مايكون مفتح
قولتله : انت عارف انت فين دلوقتي ؟؟ انت في الميدان يا حااااج في قلب الطريق و العربيات رايحة جايه
قالي : مانا هروح دلوقتي
قولتله : طيب خلاص انا هوصلك
قالي : لا يابني خليك
قولتله : لا لازم اوصلك ما ينفعش تمشي لوحدك كدا في وسط الطريق
و صممت اني اوصله ..
لكنه هو كمان صمم انه يمشي لوحده
الراجل دا كنت حاسس
ان في حاجه جواه بتنطق و تتكلم .. مش زي ما بييجي في الافلام
و يقول انه مظلوم و انه و انه
لالالا ॥ خاااالص
الراجل دا كان جواه
ايمان بالله قادر بمشية في قلب الطريق و في وسط العربيات من غير ما يخاف
قولتله : لازم اوصلك
ياحاج ماينفعش كدا علشان الطريق و العربيات
قالي : ربك ما بيبيبش حد لوحده . ربنا معانا
الكلمة دي ادتني نوع من الطمأنينة .. و حسيت انه فعلاً .. قادر يمشي و يعدي
فقولتله : طيب اعديك الناحية التانية من الطريق
قالي : اتوكل على الله يابني و سيبني انا
اللهم ارزقنا ايماناً يملأنا بحبك و حمايتك